裝修係人生大事，無論係新樓定舊樓，動工前一定要做足功課。特別係香港嘅住宅單位，氣體喉管（煤氣喉）嘅位置往往隱藏喺牆身、地板或天花入面，唔係一眼就睇到。如果你唔提前查清佢哋嘅走向，開工時一唔小心鑿穿或者損壞咗，後果可以好嚴重。所以，裝修前先確認氣體喉管位置，係保障你同家人安全嘅第一步。
好多業主貪方便，以為搵裝修師傅搞掂就得，但其實師傅未必清楚大廈嘅氣體喉管分佈。尤其係舊樓，喉管可能經過改動，圖則唔清晰，或者被隱藏咗。記得開工前要搵註冊氣體供應公司(即煤氣公司)核實氣體喉管路徑，唔係既話一旦開工鑿牆，就好似玩緊俄羅斯輪盤，隨時出事。記住：安全第一，事前查清楚，避免日後麻煩。
如果無做足功課，會有咩後果？
唔查清氣體喉管位置，後果可以好嚴重，唔好睇少呢一步。以下係幾個主要風險：
– 意外鑿穿氣體喉管導致氣體洩漏，引發火災或爆炸風險：裝修時最常見嘅意外係鑿牆或鑽孔時直接鑿穿煤氣喉。氣體一漏出，遇到電鑽火花或者明火，就好容易引發火災甚至爆炸，分分鐘連成棟大廈都受影響。呢啲意外唔係講笑，真係會搞出人命。
– 影響整棟大廈的煤氣供應，需要緊急停氣維修：如果喉管損壞，煤氣公司可能要緊急停氣，影響整棟大廈嘅供應。其他住戶冇煤氣用，會好唔方便，甚至要排期等維修，成個過程可以拖好耐，令到鄰居怨聲載道。
-「觸犯氣體安全條例：根據第51B章《氣體安全(氣體供應)規例》第23A條-在氣體喉管附近地方進行工程;
(1)任何人不得在氣體喉管附近地方進行或准許在氣體喉管附近地方進行任何工程，除非他或進行工程的人已於工程展開前採取一切合理步驟以確定該氣體喉管的所在地點及位置。
(2)在氣體喉管附近地方進行或准許在氣體喉管附近地方進行任何工程的人，須確保採取一切合理措施，以保護該氣體喉管不受因該工程所引起的相當可能會危及安全的損害。
任何人違反第23A條即屬犯法，一經裁定犯法 ——
(a)如屬違反第23A(1)條，可處第4級罰款及監禁6個月；
(b)如屬違反第23A(2)條，可處罰款$200,000及監禁12個月，又如屬持續的犯法行為，可加處按每天$10,000計的罰款。」
維修費用高昂，可能需要賠償鄰居損失：維修煤氣喉管唔係小工程，要搵合資格嘅技工處理，費用隨時過萬。如果漏氣影響到鄰居，例如整棟大廈要停氣，或者損壞咗其他單位嘅設施，你仲可能要賠償佢哋嘅損失，分分鐘搞到破產。
工程被迫停工，延誤裝修進度：一旦出事，裝修工程就要即時停工，等煤氣公司派人檢查同維修。呢段時間可能等幾日甚至幾星期，令你嘅裝修進度大受影響，仲要額外俾租屋或酒店費用，真係得不償失。
總括嚟講，裝修前查清氣體喉管位置，唔單止係為咗自己安全，係對成棟大廈嘅責任。想避免以上麻煩，最好參考官方指引，做好事前準備。
以下係機電工程署提供嘅氣體安全宣傳單張，如有任何疑問，可致電2808 3683與機電署聯絡或致電1823查詢。
小冊子下載(29-5-2026)1418
